’’میں کچھ نہیں سنوں گا، تم الیکشن سے ہٹ جاؤ، باقی ساری ذمہ داری میری…۔‘‘ یہ الفاظ مبینہ طور پر وزیر اعظم نریندر مودی کے ہیں جو ہماچل پردیش کے کانگڑا میں بی جے پی کے باغی امیدوار کرپال پرمار سے خود فون کر کے انتخاب نہیں لڑنے کو کہہ رہے ہیں۔
اس بات چیت پر مبنی مبینہ ویڈیو تیزی سے وائرل ہو رہی ہے۔ حالانکہ ’قومی آواز‘ اس ویڈیو کی صداقت کا دعویٰ نہیں کرتا۔ دراصل کرپال پرمار کو کانگڑا ضلع کی فتح پور سیٹ سے ٹکٹ نہیں ملی تو میدان میں بطور آزاد امیدوار اتر گئے۔ اب پی ایم مودی انھیں فون کر کے کہہ رہے ہیں کہ انتخاب مت لڑو۔ اس ویڈیو کو یوتھ کانگریس صدر سرینواس بی وی نے ٹوئٹر پر شیئر کیا ہے۔ انھوں نے طنزیہ انداز میں لکھا ہے کہ ’’کیا دن آ گئے ہیں ہندوستان کے وزیر اعظم کے۔‘‘ انھوں نے آگے لکھا ہے کہ ہماچل میں بی جے پی کی شکست یقینی ہے اور خوف صاف جھلک رہا ہے۔ سرینواس بی وی نے ایک دیگر ٹوئٹ میں انتخابی کمیشن سے اس معاملے میں نوٹس لینے کی گزارش کی ہے۔ انھوں نے کہا ہے کہ ہماچل میں نامزدگی واپس لینے کی تاریخ 2 دن قبل ختم ہو چکی ہے، ایسے میں کسی امیدوار کو متاثر کرنے کی کوشش کرنا ضابطہ اخلاق کی خلاف ورزی ہے۔
